लन्डन । डायमन्ड बुद्धिस्ट सेन्टर यूकेले आयोजना गरेको प्रज्ञापारमिता अथवा ह्युपति बुम वाचन कार्यक्रम तेस्रो दिन तमु धीं यूकेका अध्यक्ष जुमकाजी गुरुङ र आमा समूहका अध्यक्ष कमलादेवी गुरुङ प्रमुख अतिथिका रूपमा सहभागी भएका छन् । 
प्रमुख अतिथि गुरुङले दीप प्रज्वलन गरेर बुधबार तेस्रो दिनको कार्यक्रम सुरु भएको थियो । डीबीसी गुम्बाका अध्यक्ष चन्द्रप्रसाद गुरुङ र संस्थापक अध्यक्ष सुमनकुमार गुरुङले जुमकाजी दम्पतीलाई अध्यक्ष भएकामा खादा फेटा र फूलको गुच्छा दिएर सम्मान गरेका थिए ।
यस्तै श्रीलामा गुरुले पनि सम्मानस्वरुप खादा लगाइदिएका थिए । गोर्खा मिडियाका प्रबन्ध निर्देशक मिलन तमुलाई पनि खादा लगाएर सम्मान गरिएको थियो ।
अध्यक्ष जुमकाजीले सम्मानका लागि गुम्बा परिवारलाई धन्यवाद दिए । सो अवसरमा उनले तमु धीं यूकेका तर्फबाट गुम्बालाई ५०५ पाउन्ड सहयोग पनि प्रदान गरे । यस्तै अध्यक्ष दम्पतीले आफ्नो व्यक्तिगत रूपमा १०५ पाउन्ड पनि पूजाको लागि सहयोग गरेका छन् ।
डीबीसी गुम्बाका उपाध्यक्ष मीनकाजी गुरुङले स्वास्थ्य र सुरक्षाको बारेमा जानकारी गराउँदै कार्यक्रम सञ्चालन गरेका थिए । स्वागत मन्तव्य पनि उनैले राखेका थिए ।
अन्त्यमा गुम्बाका अध्यक्ष चन्द्रप्रसाद गुरुङले उपस्थित सबैलाई धन्यवाद दिँदै कार्यक्रम समापन गरेका थिए ।
