१४ औं नेपाली मेलाबारे तमुधीं यूके र राजदूताबासबीच छलफल

लन्डन । बेलायतमा १४ औं नेपाली मेला आयोजना हुँदैछ । आगामी २७ अगस्टमा लन्डनस्थित केम्पटन पार्क रेस कोर्समा हुने मेला सफल पार्न विशेष छलफल कार्यक्रम शुक्रबार सम्पन्न भयो ।

तमु धी यूकेका अध्यक्ष हरि गुरुङ लगायत अन्य प्रतिनिधिहरु र बेलायतका लागि नेपाली राजदूत ज्ञानचन्द्र आचार्य, शीर्ष प्रतिनिधिको उपस्थितिमा नेपाली राजदूताबास र तमुधी यूकेबीच छलफल भएको हो । छलफलमा दूतावासतर्फबाट राजदूत ज्ञानचन्द्र आचार्य, उपनियोग प्रमुख रोशन खनाल, जनरल ब्रिगेडिर रत्न गोदार र द्वितीय सचिव रामबाबु नेपाल तथा बिनु गोदार सहभागी थिए । तमुधींको तर्फबाट अध्यक्ष हरि गुरुङ, सन्ध्या गुरुङ, महासचिव डा. विशाल गुरुङसहित १५ जना प्रतिनिधिहरुको उपस्थिति थियो । 

राजदूत आचार्यले यो नेपाली मेला समस्त नेपालीको गौरवको विषय भएकाले यसमा दूतावासको पूर्ण सहयोग हुने आश्वासन दिए । उनले मेलामा अरु देशका डिप्लोम्याट्स निम्त्याउन सक्दो पहल गर्ने पनि बताए । 

मेला संयोजक तथा तमुधी ंयूके उपाध्यक्ष परशु गुरुङले नेपाली मेलाको शुरुवातदेखि हालसम्मका झलक देखाए । उनले नेपाली मेलाको तयारी कसरी भइरहेको छ भन्नेबारे वृत्तचित्रद्वारा अवगत गराए । उनले स्थानीय क्षेत्रमा लिफ्टलेट वितरण गरेर यसलाई सफल बनाउने योजना पनि सुनाए ।

नेपाली मेलामा दूतावासको प्रत्यक्ष संलग्नता र सहकार्य रहँदै आएको छ । दूतावासकै प्रायोजनमा मेलामा उत्कृष्ट झांकी प्रस्तुत गर्ने समूहलाई एम्बासडर कप प्रदान गरिन्छ । विदेशी भूमिमा नेपाली कला संस्कृति, परम्परा रीतिरिवाज र भेषभुषाको जगेर्ना गर्न यो नेपाली मेला महत्वपूर्ण छ ।

तमुधीं यूकेका उपाध्यक्ष तथा मेला संयोजक परशु गुरुङले मेलामा आफ्नो तर्फबाट तयारी भइरहेको र दूतावासबाट थप सुझाव, सल्लाह अपेक्षा गरिएको बताइन् । 

सो अवसरमा तमुधीं यूकेका अध्यक्ष हरि गुरुङले सैनिक सहचारी रत्नबहादुर गोदार ब्रिगेडियर जनरलमा पदोन्नति भएको फेटा र भांग्रा ओढाएर बधाई दिए । आमा समूहको तर्फबाट पनि आमा समुहकी अध्यक्ष सन्ध्या गुरुङले विनु गोदारलाई क्रमु ओढाई पुष्पगुच्छा प्रदान गरिन् ।