काठमाडौँ । नेपाल भ्रमणमा रहेको तमु धीं यूकेले नेपालका प्रधानमन्त्री केपी शर्मा ओलीसँग भेट गरेको छ ।
शनिबार दिउँसो मात्रै त्रिभुवन अन्तर्राष्ट्रिय विमानस्थलमा उत्रिएको तमु धीं यूकेको टोलीले साँझ प्रधानमन्त्री निवास बालुवाटार पुगी ओलीसँग भेटवार्ता गरेको हो । भेटमा तमु धीं यूकेले २४ अगस्ट २०२५ मा आयोजना गर्ने नेपाली मेलामा सहभागिताका लागि निम्तो दिएको नवनिर्वाचित अध्यक्ष जुमकाजी गुरुङले जानकारी दिए । उनले तमु धीं यूकेले वार्षिक रूपमा गरिने गतिविधिका बारेसमेत प्रधानमन्त्रीलाई जानकारी गराइएको बताए । 
जवाफमा प्रधानमन्त्री ओलीले समय मिले अन-अफिसियल रूपमा नेपाली मेलामा आउने वाचा गरेका अध्यक्ष गुरुङले बताए । सो अवसरमा सञ्चार तथा सूचना प्रविधिमन्त्री पृथ्वीसुब्बा गुरुङ, काठमाडौँ महानगरपालिकाका उपप्रमुख सुनिता डंगोल, इजरायलका लागी नेपाली राजदूत अन्जान शाक्यलगायत पनि उपस्थित थिए ।
तमु धीं यूकेका तेह्रौँ कार्यसमितिका अध्यक्ष जुमकाजी गुरुङ नेतृत्वको टोली झन्डै ३ साताको भ्रमणका लागि शनिबार नेपाल आइपुगेको हो । टोलीमा निवर्तमान अध्यक्ष हरि गुरुङसहित पूर्वअध्यक्ष, ट्रस्टी, सल्लाहकारलगायत सम्मिलित छन् । टोलीले नेपालका पर्यटकीय स्थल भ्रमण तथा विभिन्न संस्थाका पदाधिकारी, बुद्धिजीवी र इस्टमित्रसँग भेटघाट गर्नेछ । जसअन्तर्गत टोली आइतबार बिहान पोखरा प्रस्थान गर्नेछ । आइतबार नै बौद्ध अर्घौं सदन र बगर भाइ खलक फुटबल फाइनलमा सहभागी हुनेछ ।
फेब्रुअरी ४ मा आहा रारा पोखरा गोल्डकपको उद्घाटन समारोहमा सहभागी र ताङ्ले समाजका पदाधिकारीसँग भेटघाट हुने छ । ५ फेब्रुअरीमा सिक्लेस जाने, ६ मा चित्रे, ८ मा राम्जा आर्थर, ९ मा खाल्ट र १० फेब्रुअरीमा पर्वतमा आँखा शिविर प्रारम्भ गरेर पुन: पोखरा फर्किनेछ । 
यस्तै ११ फेब्रुअरीमा तमु सांस्कृतिक प्रतिष्ठान नेपालको कार्यक्रममा सहभागी हुने, १२ फेब्रुअरीमा नौलो घुम्ती, सहारा एकेडेमी, तम धीं यूकेलाई सम्मानका लागि आयोजना गर्ने सम्मान कार्यक्रममा सहभागी हुने छ । सोही दिन तमु धीं आमा समूह भने स्याङ्जातर्फ जाने छ ।
यस्तै १३ फेब्रुअरीमा पर्यटकीय गाउँ ल्वाङ जाने, १४ मा गोर्खा मिडियाका प्रबन्ध निर्देशक मिलन तमुद्वारा रचित रोधी घरको आँगन भाग चार गीतको छायांकनमा सहभागी हुने र १५ फेब्रुअरीमा पोखरा फिर्ता भएर तमु धीं नेपालसँग भेटघाट गर्नेछ ।
१५ फेब्रुअरीमा पोखरा म्याराथन, च्यार भन्ज्याङ तमु समाज च्यारिटी डिनर र आहा रारा पोखरा गोल्डकप फाइनलमा सहभागिता जनाउने कार्यक्रम छ । यस्तै १६ फेब्रुअरीमा गल्याङ जाने, १७ मा लमजुङ भ्रमण गर्ने र १९ मा काठमाडौं पुग्ने र एकरात बसाइपछि २१ फेब्रुअरीमा बेलायत फर्किने तालिका रहेको छ ।
