लण्डन
तमुधिं यूकेको निमन्त्रणामा बेलायत आएका बौद्ध आचार्य लामा गुरु शीर गुरुङलाई एक कार्यक्रमबीच तमुधिं यूकेले बिदाई गरेको छ । गत आइतबार २० मार्चका दिन तमुधिं भवन मिचेटमा तमुधिं यूकेका पदाधिकारी, सल्लाहकार र आजीवन सदस्यहरुले उनलाई बिदाई गरेका हुन् ।
आचार्य गुरु लामाले पोखरास्थित बौद्ध अर्घौ सदनको भवन निर्माणमा सहयोग गर्ने तमुधिं यूके, बिसीसी यूके, ईष्टमित्र, साथीभाइ र सम्पूर्ण दानबीरहरुलाई सहयोगका लागि धन्यवाद दिँदै आपूmलाई बेलायतमा निमन्त्रणा गरेकोमा तमुधिंप्रति आभार प्रकट गरे । पोखरास्थित बौद्ध अर्घौ सदनको प्रमुख लामा र गुरुङ लामा बौद्ध धर्म समाजको अध्यक्षसमेत रहेका बौद्ध आचार्य गुरुङहरुको महान् पर्व ल्होछारको अवसरमा तमूधिं यूकेको निमन्त्रणामा गत डिसेम्बर २०१५ मा बेलायत आएका थिए । बिदाई कार्यक्रममा तमुधिं यूकेका भूतपूर्व अध्यक्ष मे.रि. डमर घले एबिईले उनको भ्रमणको बारेमा बोलेका थिए भने सल्लाहकार क्या.रि. राजु गुरुङले विभिन्न जिज्ञासा राखेका थिए । उनको बेलायत बसाईको क्रममा तमुधिं यूके, बीसीसी यूके र विभिन्न दानबीरहरुले उनी प्रमुख लामा रहेको बौद्ध अर्घौ सदनको भवन निर्माणका लागि करिब १ करोड रुपैया“ संकलन गरेको तमुधिं यूकेका अध्यक्ष सुर्जे (रामचन्द्र) गुरुङले जानकारी दिए ।
तमुधिं यूकेका अध्यक्ष सुर्जे (रामचन्द्र) गुरुङको अध्यक्षमा सम्पन्न भएको बिदाई कार्यक्रममा उपाध्यक्ष ज्ञाम गुरुङले स्वागत मन्तब्य राखेका थिए । महासचिव हरि गुरुङले कार्यक्रम सञ्चालन गरेका थिए ।
